一年將過，從事投資生意嘅考評局委員會主席陳仲尼（Rock）回顧一年公司業績，幾感慨咁用「坐過山車」嚟形容。佢話上半年生意不錯，直到四、五月時以為今年大豐收，點知到六月嘅Ａ股股災同八月人民幣貶值都影響好大，可謂始料不及。

陳仲尼

Rock話，由於佢公司持有唔少人民幣點心債券，由上半年有利潤，到下半年變成「摸和」，只好寄望明年市道有好轉，再覓商機。對明年市道，佢話保持觀望態度，因為除咗美國有機會再加息，內地經濟亦有放緩迹象，預計香港樓市亦將有下調趨勢，認為投資要小心謹慎。不過，佢對投資歐洲酒店則幾樂觀，早前喺歐洲購入一間酒店，估計五年可以回本。而今個聖誕節，Rock就同家人一齊去咗加拿大滑雪。

第一手消息請下載on.cc東網iPhone/iPad/Android/Windows Phone Apps