政壇：港產商品 潮玩智能設計
香港出口商會日前舉行鑽禧午宴，生產廚具為主嘅商會理事孫榮聰（Eric）同弟弟孫榮良都有出席，佢哋話，現時廚具除咗功能實用，用家對器具外觀都好講究，靚嘅廚具甚至變成一種潮物，唔少人爭相買齊一套。
孫榮聰（後）指廚具都趕潮流，前為其弟弟孫榮良。
未來廚具既要靚，又要有設計感，佢哋都唔執輸，最近就生產緊一批有特別花紋嘅廚具。不過，Eric話智能化亦非常重要，例如可以透過手機應用程式提示用家幾時夠鐘熄火等功能，煲水同煮嘢都唔使驚煮過龍，關鍵時刻發揮重要作用。
當日出席嘅仲有理事顏志永、陳稼晉、香港優質標誌局主席丁煒章同香港工業設計師協會主席楊兆航等。至於商會會長丁天立（Ivan）就有爸爸丁午壽出席捧場，佢哋家族經營玩具製造生意，以玩具火車等模型為王牌，因此Ivan童年時家中好多玩具火車玩，雖然話依家啲小朋友大多玩手機同平板電腦，但Ivan話都會不時買玩具畀兒子，好似積木咁，佢話就算個仔唔玩，佢都會砌嚟玩吓，當買畀自己喎。
