政壇：搞搞政：華員會落柯打 張雲正真頭痕
公務員事務局局長張雲正是中途換將，履新後與公務員團體接觸是分內事。日前，本地最大公務員工會「華員會」在新一期會刊中，向他提出五項訴求，要求跟進多項懸而未決嘅爭議。公務員雖是金飯碗，但管理卻更繁複，現屆政府任期只剩年半時間，張雲正驟然收到咁多「柯打」，真係頭痕兼火燒眼眉喇。
華員會要求，張雲正採取「先易後難」分批處理以下爭議，包括醫管局支援服務職系員工能夠與公務員達到「同工同工時」；又認為當局可以容許參加國情研習的工會幹事，享受特許缺勤，即係毋須請假參加活動。此外，華員會曾要求林慧思就爆粗辱警一事道歉，所以今次訴求都針對語言暴力，盼作為僱主的政府能確保公務員安全和健康，落實措施阻嚇同懲處語言暴力。
另要求全體公務員可享有薪「食飯鐘」，為非公務員合約員工爭取免費到公立普通科門診診療，又要求當局協助想轉制做公務員嘅員工轉職。呢啲要求真係燙手山芋，一個處理不當，唔止影響公務員士氣，仲會掀起風波，張雲正想唔頭痕都難。
