政壇：匿名信數兩罪 高佬賢中冷箭

喺呢封信中，高佬賢被指挪用公帑「包養」當選葵青區議員的黨友郭芙蓉；又指佢喺立法會財務委員會二月通過漁業貸款基金撥款時，只顧在辦公室打遊戲機而錯過投票。

投訴人用咗兩頁紙作控訴，最大篇幅當然係高佬賢申報嘅立法會開支，以支付聘請郭芙蓉做議員助理嘅人工，又指郭芙蓉後期已經無返立法會同參與漁農界工作，但仍全額支取議員助理工資，仲用咗「包養小花郭芙蓉去準備二○一五年區議會選舉」嚟形容。

一概否認指控

此外，投訴人又「揭發」高佬賢在漁業貸款基金投票時，只顧在辦公室打遊戲機，打算過咗關才去開會，點知錯過投票，仲稱不少該黨職員都知道這件事。高佬賢接受查詢時一概否認，指做助理並非一定要留喺立法會工作，有時外勤或在家都要工作。佢希望繼續聘請郭芙蓉，但對方日後要做全職區議員，可能會改用另一種方式聘請。

至於為打機錯過漁業貸款基金撥款投票一事，本報翻查當日投票紀錄，漁業貸款基金撥款係冇記名表決，高佬賢承認佢的確冇投票，但並非去咗打機，而係全程喺場外拉票，仲話有好多人可以幫佢做證。佢雖然有得解釋，但投訴咁細緻，高佬賢都要留意吓、做得更好嘞。