聖誕鐘聲響起，又係普天同慶嘅日子，雖然今年市道唔係咁好，但節日氣氛始終唔少得，尤其係中環蘭桂坊一帶，每逢節日例牌人頭湧湧，水洩不通。不過咁，慶祝還慶祝，最緊要打醒十二分精神，以免樂極生悲吖。

唔係杞人憂天㗎，蘭桂坊係出晒名嘅人間妖域，烏煙瘴氣，七國咁亂，乜嘢事都有可能發生。淨係今年頭十一個月咋，警方就喺蘭桂坊偵破五十五宗毒品案，其中販毒佔三十七宗，較去年同期急升逾兩倍；被捕嘅五十九人中，絕大多數係手持「行街紙」嘅酷刑等免遣返聲請人，來自非洲岡比亞嘅就有二十九人。

警方話喎，今年年初起發現有持行街紙人士喺蘭桂坊進行毒品交易，經嚴厲打擊後，第四季涉免遣返聲請人嘅毒品案已「全部靜晒」。其實，「全部靜晒」只係暫時嘅咋，最怕野火燒不盡，春風吹又生，隨着免遣返聲請人愈來愈多，蘭桂坊只會愈來愈烏煙瘴氣。

除咗成為販毒溫床，蘭桂坊「黑的」問題同樣日益嚴重。中區警署今年接獲約二百六十宗針對的士嘅投訴，最離譜嘅一單係今年萬聖節，有個女仔喺蘭桂坊往天水圍，黑的居然開價一千元，問你怕未。

講到底，蘭桂坊之所以淪為人間妖域，皆因港府假仁假義，中門大開。係人都知，九成九以上免遣返聲請人都係假難民，佢哋獲得行街紙後橫行無忌，有人打黑工，有人作奸犯科，唔止造成嚴重嘅社會問題，而且浪費納稅人金錢。小數怕長計，港府為聲請人提供嘅各項支援，包括法律、住屋及食物等開支不斷飆升，三年前接近四億元，今個財政年度已增至六億四千萬元，你話納稅人係咪冤枉吖。

仲有吖，呢班假難民近年更成為本地黑幫嘅「僱傭兵」添。好似和勝和前坐館「上海仔」咁吖，近期多次涉以貼街招抹黑等方式勒索城中富豪及明星，而「貼街招黨」裏面就有唔少係持行街紙嘅假難民，佢哋膽正命平，就算被捕亦難以入重罪，最多只能告以亂拋垃圾或誹謗。有啲被勒索嘅富豪為咗息事寧人，交付大筆金錢當係破財擋災，結果令黑幫更加有恃無恐。

其實，姑息等於養奸，對付不法之徒又好，對付假難民又好，絕對唔可以仁慈，否則，唔止蘭桂坊淪為人間妖域，成個香港都遲早變成無法無天嘅罪惡之城，叮！