城中鏡：雙料校董 方文雄有排忙
政府尋日刊憲公布多間大專院校嘅高層任命。中總常務會董方文雄分獲委任為港大及科大嘅雙料校董，同時獲再度委任為城大顧問委員會成員。大專學界近年風起雲湧，睇嚟方文雄喺未來幾年有排忙喇！
方文雄獲委任港大及科大校董。（資料圖片）
另獲委任為港大校董嘅仲有陳衍里、陳南祿、孔桂儀同李維達，任期三年，由本月十二日起生效。資深銀行家陳子政同立法會工業界議員林大輝分別獲委任為理大校董會主席及副主席，任期三年，下月一日起生效。浸大校董會主席鄭恩基同副主席陳黃穗再獲委任，任期分別係三年同一年，下月一日起生效。
唐家成則獲委任為大學教育資助委員會主席，陳鎮仁冧莊任職業訓練局主席，前者任期三年，後者任期至一七年底。剛喺區選落敗嘅楊文銳就獲委任為職訓局成員。至於懸空咗嘅港大校委會主席，則未見公布任命。
