早前喇沙書院舉辦聖誕周年晚會，唔少名人校友都有出席。該校學生向來運動出眾，熱衷跑馬拉松嘅信興集團主席兼行政總裁David蒙德揚自爆，當年佢鍾意踢波同游水，仲參與過學屆游泳比賽添！生咗仔之後，經常陪囝囝一齊游，點知游游吓個仔游得仲快過佢。佢笑言覺得冇癮，咪轉玩個仔唔識嘅運動、即係跑步囉！

蒙德揚（左）同蔡尚圻均受母校影響熱愛運動。

李宗德（右）偶遇班主任Thomas。

喇沙舊生會會長朱永暉（右）與黃嘉純一同出席聖誕周年晚會。

David話最懷念母校嘅木樓梯，對百厭嘅學生嚟講係有玄機㗎！皆因有人行過木樓梯時會發出「吱吱」聲，有時佢哋畀老師罰企，如果聽到神父行緊樓梯上嚟，為免被神父知道受緊罰，就會擰轉面扮行去廁所，等神父行過先，或者玩緊時聽到樓梯響，就可即刻扮乖。

湯徫掄被報學非洲語

理文造紙執董李文斌對學校嘅樓梯都有難忘回憶，因為當時操場側邊斜坡有幾級成四呎高嘅梯級，個個學生都鍾意兩級兩級跳落嚟，依家諗番好在當年冇試過跌落嚟受傷。

飛馬足球會球會總監蔡尚圻都係校友，由讀書到依家都咁鍾意踢波，除咗代表過香港青年軍，依家仲做埋球會總監。

同場仲有和富社會企業會長李宗德同律師黃嘉純，李宗德仲巧遇中四班主任Thomas。黃嘉純自稱當年好調皮，最愛整蠱同學，記得有次佢執到張有關免費外語班嘅傳單，就幫隔籬同學報咗名學非洲語，搞到嗰位同學仔成日收到電話被追問幾時上堂，認真搞笑。呢位受害者就係孔教學院院長湯恩佳兒子湯徫掄喇！

第一手消息請下載on.cc東網iPhone/iPad/Android/Windows Phone Apps