政壇：區議員請助理 同工不同酬
距新一屆區議會任期只剩一個星期，唔少候任區議員都密鑼緊鼓做準備，我哋喺勞工處網站招聘見到唔少議員請助理，但細心一睇，原來議員助理薪金係海鮮價，同工不同酬情況十分嚴重。
涂謹申聘議員助理出手較低。 （資料圖片）
區議員可謂愈資深出手愈低，例如連任成功嘅工聯會陳文偉，僅出月薪八千至九千元，每周工作五天半。建仔簡志豪則以九千元聘請擁有專上程度嘅助理。
雙料議員、白鴿黨涂謹申亦只出手九千元，但要求應徵者有大學程度加一年經驗，每周仲要工作五天半，咁嘅待遇唔知阿涂要等幾耐先請到人嘞！另外兩位雙料議員胡志偉同范國威就慷慨啲，同係要求專上學歷，但月薪最高可達一萬二千元。
至於一班新丁議員就明顯闊綽得多，白鴿黨李永成出手最高，出價月薪最高一萬五千元，而且每周工作五天，男士仲享有五天侍產假。其次係擊敗葛珮帆嘅工黨葉榮，以一萬四千元請人，仲講明請有興趣投身殘疾議題同平權發展嘅人。
而白鴿黨曾素麗就以一萬二千元請中五程度嘅助理，唔知班資深議員有乜感受呢？
