政壇：版權大戰未了 Greg蘇放假充電

話說商務及經濟發展局局長Greg蘇錦樑早前取消外訪，為俗稱「網絡23條」嘅《2014年版權（修訂）條例草案》拉票防流會。但聖誕佳節到，立法會因此休會兩星期，阿Greg隨即執拾行李去旅行，似乎未因版權條例草案受阻而影響心情。

蘇錦樑

阿Greg將會由後日起放足十日假，翌日復工就出席立法會大會，續議由議員何秀蘭提出嘅中止待續議案。放假放得如此「盡興」，莫非阿Greg好有信心假期後議員會乖乖合作開會？

至於阿Greg嘅頂頭上司、財爺「鬍鬚曾」曾俊華亦足足放假十二日，鬍鬚曾一早預告會閉關埋首寫財政預算案。除咗佢哋兩個，特首梁振英今日起休假至三十一日，會放假嘅仲有政務司司長林鄭月娥、保安局局長黎棟國，以及早前參加長跑仆倒而復工不足一星期嘅食物及衞生局局長高永文。