政壇：立會退休管事 畀舊芸私有化
仲記得與資深議員劉皇發等人同喺八十年代「出道」、立法會最資深管事Tony羅秉義今年初退休，唔使勞碌照顧議員喺議會內嘅起居飲食，原來佢係靜靜雞畀Ann蔣麗芸「私有化」，專為阿Ann沖咖啡？
羅秉義（左）過去三十年「湊大」不少議員，依家就被蔣麗芸（中）「私有化」咗。（互聯網圖片）
Tony過去喺立會負責照顧議員飲食、會議廳幫忙傳紙仔、呈交文件，近三十年「湊大」唔少議員，今年初未正式退休已有多名議員、甚至前議員「挖角」力邀佢過檔，其中飲食界議員張宇人邀佢管理私房菜，新民黨葉劉淑儀亦力薦佢做飲食，但加入立會前曾任調酒師嘅Tony有感做咗飲食多年，唔想再做老本行，決定喺一眾「筍工」中揀做阿Ann嘅私人助理。
據知Tony現喺啟德德朗邨幫阿Ann處理地區事務，佢笑言阿Ann好有誠意，而且新工「薪高糧準」，時間有彈性，雖同過去服務議員性質好唔同，但滿足感更大，做得好開心，仲話假如阿Ann唔炒佢，想一路做落去添！
阿Ann接受查詢時否認「私有化」Tony，笑言係公有化，服務大家先啱喎。
