現年十九歲嘅學民思潮召集人黃之鋒打算參政都唔係秘密,好似佢之前申請司法覆核,要求將參選立法會最低年齡由二十一歲降至十八歲,就講到明一旦成功會考慮參選。據聞佢近排密密拉攏學聯秘書長羅冠聰同部分傘後組織,例如派三人出選中西區區議會嘅西環飛躍動力,希望加上學民班底成立一個政黨,劍指明年立法會選舉。黃之鋒仲落足嘴頭叫人參選,希望立法會五區直選都有候選人。據了解,西環飛躍動力對佢嘅說法唔太感興趣,但羅冠聰就考慮出選新界西喎!

羅冠聰考慮出選新西係因該區當選門檻較低,加上現時多名泛民現任議員都老態龍鍾,佢自認有機會吸到一班首投族同支持傘兵嘅選民。但諗就容易,佢夠唔夠班都係疑問。因為學聯依家分崩離析,據聞有人批評羅性格柔弱,質疑佢冇統領能力,學聯內部都唔係好多人撐佢出選。黃羅二人亦做咗兩手準備,一旦司法覆核成功,黃之鋒就會出選新西,到時羅冠聰將另選他區出戰。

黃之鋒明知未夠班都咁熱切參選,都係想累積政治能量,就算出年入唔到閘,再下屆二○二○年選舉都叫做有班底出選。但係佢想要達成目標,邊有咁易吖?黃之鋒受查詢時否認目前組黨,話得佢一個點組黨?仲話自己連參選權都冇,但如早前所講,若司法覆核成功就會參選喎!講就咁講,都係嗰句:政治一日都嫌長,大家拭目以待喇!

第一手消息請下載on.cc東網iPhone/iPad/Android/Windows Phone Apps