政壇：羅健熙棄超選博坐正
區議會換屆選舉塵埃落定，其中一個突出現象係更新換代嘅呼聲甚高，連泛民具知名度嘅白鴿黨「AV仁」何俊仁同民協馮檢基，都雙雙落選收場，呢場更新換代風暴開始蔓延至建制泛民各大黨派，有傳屬於「乳鴿」嘅白鴿黨副主席羅健熙有意放棄出戰俗稱「超級區議會」嘅區議會第二界別議席，專心博「升呢」做黨主席。
綜合多方消息指，一旦現任黨主席劉慧卿喺明年底唔角逐連任，兩名黨副主席羅健熙同尹兆堅，同埋黨總幹事林卓廷都有機染指，惟觀乎三人中，以羅健熙接任主席嘅呼聲最高，事關林卓廷本身喺黨內人緣麻麻，「升呢」或令黨內部分人有反彈；尹兆堅則因早前區選落敗令其喺黨內聲勢受挫，加上佢加入白鴿黨時間尚短，喺天時地利方面都較輸蝕。
稱「畀黨多一個選擇」
立會超級議席嘅形勢亦日新月異。仲記得泛民喺一二年超級議席連取三席，當中白鴿黨染指其中兩席，但剛過去的區選結果顯示，除白鴿黨外，民協同新民主同盟都有最少十五名民選區議員，換言之取得超級議席嘅入場券，再加上本土派同傘兵若連成一線，亦有可能取得入場券一試身手，故白鴿黨內部有聲音指，不如以力保一席超級議席為基本盤。
羅健熙接受查詢時首先話，好雀躍面對依家社會嘅世代交替呼喚，外界估佢想選主席亦「非常合理」，至於係咪選就冇咁快決定，一如當年佢選副主席都係臨時決定一樣。對於係咪出戰超級議席嘅個人意願，佢承認依家政治大環境要睇埋其他泛民，未必想出戰就可如願，依家繼續排隊係「畀黨多一個選擇」喎。講到底，羅健熙如果「升呢」主席成功，進身立法會似乎只係時間問題嘞！
