徵費、徵費、徵費，港產官僚無嘢叻，最叻一心鑽進錢眼裏，搞到環保政策無一唔係淪為擾民政策。呢嗱嗱嗱，話口未完，港府又要徵費，市民又要大破慳囊喇。

當局話喎，建築廢料收費水平自○六年引入後未曾調整過，計劃大幅調高建築廢料處置收費，其中公眾填料費會由每公噸二十七元增至七十一元，增幅達一點六倍；篩選分類費亦由每公噸一百元增至一百七十五元，增幅逾七成；而堆填費則由每公噸一百二十五元增加至二百元，增幅六成，都咪話唔乸脷呀。

官老爺發錢寒仲係其次，最驚係弄巧反拙。係人都知，非法棄置建築廢料嘅問題一直存在，主要係因為貪方便同為咗逃避徵費，家陣當局大幅調高收費，容乜易事與願違，令非法棄置問題變本加厲o架。有人擔心好事變壞事，更加唔環保，唔係冇道理o架。

其實要解決建築廢料之患，除咗寓禁於徵，最重要係加強執法。環保署官員為咗推銷收費方案，大派定心丸話會執法同調高徵費雙軌並行，仲拍心口會喺更多非法棄置黑點裝閉路電視，加大力度打擊咁話。實情係點？數字最能說明問題，去年當局收到近一千七百宗非法傾倒建築廢料嘅投訴，只有四十四宗個案成功檢控，檢控率僅兩個百分點咁大把，有無搞錯吖。

當局執法懶懶閒，難怪唔少人鋌而走險，以身試法啦。大家有眼睇，近年非法棄置建築廢料嘅問題愈來愈離譜，以前不法之徒或者會車去新界嘅荒廢農地，依家索性明目張膽棄置喺市區路邊，堆成一座二座垃圾山，阻礙途人出入事小，途經嘅駕車人士一唔留神，分分鐘釀成車禍o架。

唔講唔知，非法棄置建築廢料後果可大可小，點止引發車禍咁簡單。嗱，深圳咪發生一單罕見山泥傾瀉事故，數十棟大樓倒塌或被掩埋，上百人失蹤，罪魁禍首正正係違規傾倒建築泥頭嘅堆放場呀。正如網民話齋，呢次絕對係人禍。

弊在港產官僚仲喺度發白日夢，指非法建築廢料棄置物只有一斗車嘅容量，規模同深圳事故唔可以相提並論咁話。喂，連堆沙成塔嘅道理都唔知，仲學人搞乜環保吖。一句講晒，當局對建築廢料非法棄置問題不監不管，第時唔止廢料「圍城」噩夢成真，分分鐘變成廢料「封城」，咁就大件事嘞，叮！