「恒生新抱」何倍倩同老公正身在北海道滑雪度聖誕，因Twins BB年紀尚小所以冇同行，同行嘅大仔Lawrence現年只有六歲，原來已經係滑雪能手，技術更比媽咪高超，何倍倩話：「發覺小朋友學滑雪易好多，仔仔滑過幾次就識，大人始終會驚。」佢話當地唔少年齡只有三、四歲嘅日本小妹妹，滑得又快又好，佢自言技術不濟，又話：「自己滑雪唔叻，但同自己講，唔可以畀三、四歲嘅小朋友喺我前面，所以每次見到佢哋，我就變得好勇敢，一定要快過佢哋。」

何倍倩同仔仔到東京參觀村上隆畫展，大開眼界。

何倍倩話仔仔滑雪仲勇敢過自己。

此行佢哋仲到東京參觀咗村上隆嘅畫展，令佢同仔仔大開眼界，佢話同小朋友出埠，一定唔會去Shopping，睇畫展同玩運動，先係佢哋家庭旅行嘅指定動作。

第一手消息請下載on.cc東網iPhone/iPad/Android/Windows Phone Apps