城中鏡：中年再盛放
人到中年會遇上乜嘢危機？部分人可能係因工作多時感到迷失方向，撒瑪利亞防止自殺會主席Robert黃祐榮過去都接觸唔少求助個案，形容生命中點美好都必定會有黑夜，低谷係人生必經階段，就好似花開花落一樣；40+協會創辦人Rita趙淑儀就用親身經歷，指人到中年身體起變化，自己喺幾年前亦曾經患癌，但幸運地能夠數個月內康復。或者人到中年嘅變化無可避免，最關鍵係以乜嘢心態去應對。
黃祐榮認為低谷係人生嘅必經階段。
陳曦齡（左）同趙淑儀嘅生活都各自各精彩。
前任得獎者施家殷（左）同現任得獎者葉賜添同場分享喜悅。
40+協會早前舉行「40+典範頒獎禮」，表揚能夠衝破身心老化，再創生命高峰嘅七位社會傑出人士，得獎者包括Robert、剛退休嘅培正中學前校長葉賜添等人，同場仲有唔少早年嘅得獎者均有出席支持活動，包括大家樂集團主席陳裕光、建時地產主席施家殷等人。
Robert分享感受時話，做人多元化會有助面對挫折同難關，事關中年人較難面對失去，因為中年人唔似後生時容易見到希望，當失去本以為能夠捉緊嘅事，會特別容易將事件放大而崩潰。就此，佢主張豁達面對問題，唔好留戀已消失嘅機會，佢更形容生命點美好都必定會有黑夜，低谷係人生必經階段，睇嚟心態都係處理中年危機嘅重要因素嘞！
陳曦齡感激家人支持
同場嘅維特健靈董事長Helen陳曦齡憶述，自己嘅一盤生意非一帆風順，又感激老公面對非稱職嘅家庭主婦都從無怨言，而且兒子又表示願意接手生意，令到佢更有動力工作，難怪可以再創高峰！佢又認為自己仍有魄力應付生意，估計同生活習慣有關，因為佢每日都做運動，又早睡早起喎。
