政壇：搞搞政：議員變臉見唔慣 楊偉雄舉步維艱
喺一波三折下，創新及科技局先得以成立，局長楊偉雄趁尋日創科局「滿月」與傳媒午宴時，不點名批評部分議員平日同佢會面就一個樣，但喺立會發言質詢政府時又變咗另一個樣，對呢種「變臉」神技大感驚奇，對佢嘅情緒管理係好好嘅訓練喎。其實各黨派議員私下講一套、公開講一套嘅「變臉」劇目，幾乎每日都喺立會上演，楊偉雄咁都覺得驚奇，真係令人替佢同整個創科局擔憂。
楊偉雄又話早前佢聲言可以喺兩周內完成委任副局長同政治助理嘅程序，但依家睇嚟有關預測「比較少少樂觀」，但佢否認係人選出問題，而係相關嘅內部程序比佢想像中複雜。其實政府內部程序複雜同官僚根本唔係新事物，佢竟然好似完全唔知情，想唔話佢新兵上陣、入世未深都唔得。
社交網開戶唔畀留言
點樣鼓勵其他政府同事增加應用創新科技？佢直言新科技「有好亦有壞」，同事要學習點樣應付壞嘅部分。佢預告自己會開番個社交媒體帳戶，但暫時唔會公開畀人留言，否則「（收到）幾千個message（訊息）死梗」，唔通呢啲就係佢口中嘅壞部分？開設社交媒體帳戶又唔畀人溝通互動，咁開嚟又有乜意義呢？
仲記得警方早前大力打擊Uber服務，令到曾公開大讚Uber嘅楊偉雄畀人翻舊帳。佢尋日重申，Uber喺新加坡有同政府合作，但喺香港嘅營運模式就有違法之嫌，不可相提並論，強調不可先犯法、後修法，建議Uber積極尋求同港府合作。
佢又提到香港投放喺創新科技嘅公私營資金比例，現時大約係六比四，佢希望可逐步調整為四比六，同其他先進城市看齊。可惜喺泛民拉布下，佢嘅任期只係剩番大約一年半，有關「雄」圖偉略，睇嚟好難喺佢任內做到。
