政壇：教聯會新竇 力吸年輕族
依家講求年輕化，連有四十年歷史嘅香港教育工作者聯會都唔例外。教聯會副主席王惠成話該會現時約有三萬名會員，當中不乏資深教師，踏入四十周年，希望可改變形象，所以喺觀塘開設教師俱樂部畀教師「聚腳」，期望新會所啟用後，能夠吸引「新血」，即係更多年輕教師加入。
王惠成（右）同蔡若蓮都期望新會所啟用後有新形象，吸引更多年輕教師加入。
除咗改會徽，教聯會八月開始着手籌備新會所，會所T-Club內設有三間活動室，供學校同教師租借開會或辦活動。教聯會又安排精品咖啡店駐場，開放畀公眾，以吸引區內上班族到會所用膳，而教師會員則可享八折優惠，會所將於今日正式投入服務。
教聯會今日將就新一份施政報告向教育局提交建議書，另一副主席蔡若蓮話教育局早年為紓緩中學「殺校」危機而推出嘅「三保政策」即將屆滿，學校要陸續交還過剩教席，雖然教育局稱可透過自然流失方式吸納過剩教席，但佢認為局方說法不切合實際教學需求，又話：「如果一個音樂老師退休，佢個教席唔通由中文教師嚟填補？」教聯會建議局方將「三保政策」延長兩個學年，至升中人數回穩，讓學界可以「舒口氣」。
