政壇：張華峰自誇大圈子

立法會政制事務委員會尋日討論明年嘅選民登記運動，肥老闆質疑政府無落力為功能組別選舉宣傳，令到坊間對功能組別存有唔少誤解，亦忽略咗功能組別對香港社會穩定同經濟發展嘅重要性。佢更點名批評泛民經常抨擊功能組別代表性，好似中傷功能組別議員零票當選，係「小圈子」選舉等等。

話選民遍布全港

肥老闆隨後展開反擊，直指功能組別議員有專業資格、有理想，而選民更遍布全港，以地域性嚟講，選區比分區直選更加大，直指功能組別唔係「小圈子」選舉，而係「大圈子」選舉。言論一出惹到議事堂傳出嘩嘩聲。如果由此推論，莫非肥老闆係「大圈子」一分子，甚至係「大圈子」嘅產物？

雖則肥老闆全力為功能組別「護航」，但似乎得唔到泛民議員認同，其中白鴿黨嘅劉慧卿就話二○一二年立法會選舉有十六個功能組別候選人自動當選，質疑市民何來有意欲登記做選民。似乎撐反功能組別陣營，暫時都係繼續各說各話，難以取得任何共識，而當局又會唔會聽肥老闆嘅意見，撥多啲資源加強功能界別選舉嘅宣傳呢？

會議除咗討論選民登記運動，亦有討論優化選民登記制度，當局考慮要求新登記選民提供住址證明文件，又建議提高作出虛假聲明罪行嘅刑罰，由罰款五千元及監禁六個月升至罰款一萬元及監禁兩年。普遍議員都認同要提高刑罰，但對需唔需要住址證明就存有分歧，而建仔就率先表示有保留。咁搞法，唔知又要拗幾耐？