諾貝爾經濟學獎得主講過「從政者不會變成天使」，意思係政客無論扮到幾清高，講得幾好聽，其實都係為咗追求個人利益嘅咋，可謂一矢中的，正正係香江政客嘅最佳寫照。

大家有眼睇，五名反對派議員接受壹淫媒老闆淫賤黎秘密政治捐款，引起社會嘩然，其中工黨李卓人及社民連梁國雄更被立法會議員個人利益監察委員會立案調查添。最匪夷所思嘅係，即使兩人口供矛盾，疑點重重，最後居然獲放生，簡直離晒大譜。正如「東方報業民意調查」顯示，大多數受訪者批評反對派政客包庇護短，而立法會調查好似做騷咁做，完全係場鬧劇。

不過咁，雖然兩人被輕輕放過，但議監會報告亦揭露好多從未披露過嘅驚人內情，隨時奇情過推理小說㗎。嗱，好似李卓人咁吖，收受淫賤黎一百五十萬元捐款唔止，仲將其中五十萬元捐款「袋住先」近九個月，儘管東窗事發後已嘔番畀工黨，但衍生嘅利息就據為己有，被質疑涉及「公職人員行為失當」等刑事罪行。難為佢仲死撐啲利息係「好少嘅數」，唔止無賴，簡直無恥。

仲有喎，淫賤黎喺立法會作證時好似食咗誠實豆沙包咁，自爆佢一直定期向工黨捐款，但李卓人就矢口否認，兩人嘅口供明顯有矛盾，肯定其中有一個人講大話喇。如果順着呢條線索追查落去，隨時爆出更多驚天大醜聞呀。

綽號長毛嘅梁國雄都係一擔擔嘅咋，佢暗中將黑金拆細存入唔同戶口，擺明心中有鬼喇。有人質疑做法唔合常理，唔止有洗錢之嫌，更可能涉及偽造文件添，唔係冇道理㗎。

咁點解李卓人同梁國雄最後獲得放生呢？鬼咩，議監會反對派同建制派各有三名委員，投票結果係三比三，只能作出投訴「唔成立」嘅結論，反對派只問立場，不分是非，議議相護，簡直醜陋之極。李卓人夠膽話議監會報告釋除咗公眾疑慮喎，直情係侮辱公眾嘅智慧。嗱，上述民調大部分受訪者都認為議監會組成及裁決荒謬，應交由議會外獨立人士調查，足證市民眼睛雪亮。

所以話啫，反對派政客從來都係雙重標準，官員涉及利益衝突，佢哋就死死咬住唔放，輪到自己人出乖露醜，佢哋就公然包庇。計太一叮話齋，指望立法會自己人查自己人盞與虎謀皮嘅咋，最終惟有寄望廉政公署亮出寶劍，為港人斬魔伏妖咯，叮！