聖誕未到，名模琦琦已度過咗白色聖誕，仲同聖誕馴鹿近距離接觸，開心咁話夢境成真。現身喺溫哥華度假嘅琦琦同囡囡Ella任晴佳及友人前日上山滑雪，連同Ella在內共有四位小朋友，小朋友見滿山白雪，開心得喺山上雪戰幾場，互相用雪敷頸，又喺雪地滾嚟滾去，經過五個小時大戰，各人全身由頭至腳都濕透。前日Ella宣布「打敗仗」，發高燒至38多度，琦琦要急急喺當地買藥畀囡囡食，琦琦話：「見佢件衫濕晒，我已經叫佢換衫，佢又話ok，終於都唔ok，事後同老公講，我都係戇居，應該嗰時逼Ella換衫先啱。」

琦琦近距離見到馴鹿勁開心。

囡囡Ella喺山上雪戰幾場，成身濕晒。

琦琦話最開心喺山上見到Reindeer馴鹿，又話：「最鍾意鹿，嗰度有幾隻，聖誕節前見到佢哋，好似夢境成真，朋友見到我啲相，仲問我係咪Key隻鹿上去，真係靚到難以相信。」由於Ella病倒，原定尋日繼續滑雪嘅行程亦改變，要乖乖留喺酒店休息。

第一手消息請下載on.cc東網iPhone/iPad/Android/Windows Phone Apps