政壇：鄭泳舜扮駱駝氹仔

深水埗區議員Vincent鄭泳舜尋日喺社交網站上載一張扮駱駝嘅趣怪相，仲留言話，等咗多年終於可以演駱駝角色，雖然入邊有啲焗，但係都要努力演活佢，唔可以令小朋友失望咁話。原來Vincent參加細仔嘅幼稚園聖誕劇表演，佢扮駱駝，細仔就扮牧羊人，仲有其他家長扮吓星星同樹。雖然過程好開心，但因為笠住塊布冇得睇細仔演出，所以有小小失望。期間亦發生件趣聞，Vincent嘅太太幫佢哋影相時，唔小心跌咗副隱形眼鏡，有家長以為佢係睇表演時感動到喊，真係搞笑。