政壇：鄧鉅明過火辣聖誕賀雙喜
太子珠寶鐘錶主席鄧鉅明、太太鄧宣宏雁同兒子及家人尋日起程到新加坡旅行，鄧太話好喜歡新加坡：「新加坡近近哋，食物又好味，天氣又暖，咁啱呢幾日香港天氣凍，所以我哋就過一個火辣聖誕嘞！」早前鄧太因腰傷而在家休息多時，幸好腰患能趕喺假期前康復，令佢能享受旅程。適逢前日元朗新店開幕，同日鄧生嘅愛駒又拉頭馬，雙喜臨門，此行正好順道慶祝一番，別具意義！
鄧鉅明兩公婆喺新加坡過火辣聖誕。
愛駒勝出，鄧鉅明（中）振臂高呼。
雖然經濟不景，但無損鄧生嘅業務，被指為「良心老闆」嘅鄧生，早前已明言唔會削減人工，會與員工同舟共濟。前日位於元朗首間新店正式開幕，佢透露元朗仲有兩間分店會陸續喺下年度開張，佢睇準元朗嘅人數喺未來會激增，人流將會逾嚟逾多，所以選址元朗開設三間新店，而鐘錶價位則介乎約二萬至十萬元，配合居民嘅消費指數。前日鄧生親臨元朗新店，喺吉時五點主持燒豬儀式，預祝業務蒸蒸日上！喺主持新店開幕前，佢率先同太太到馬場為愛駒「閃耀鑽皇」打氣，期間與友人林建康及萬希泉老闆沈墨寧等一同肉緊歡呼，最後愛駒跑出拉頭馬，贏得約四十多萬獎金，認真可喜可賀！
