立法會上星期四恢復二讀《版權條例草案》，喺公文袋陳家洛、毛孟靜以及其他激進泛民不斷點人數下，審議進度緩慢。其中一個拉布黑手嘅公文袋，尋日被踢爆對草案嘅立場不斷改變，更加有人批評佢哋不分青紅皂白，被網民牽着鼻子走添！

事緣政府曾喺一一年前將草案提交立會進行二讀，時任公文袋立法會議員陳淑莊就提出修正案，要求政府豁免惡搞、戲仿等二次創作不屬侵權，作為支持草案嘅條件。當時政府未作讓步，草案最後亦因網民激烈反對而暫時撤回。

斥癱議會功能

時至今日，政府再次向立會提交嘅草案經過三年諮詢後已得到唔少改善，而當年陳淑莊提出豁免惡搞、戲仿等條件，亦包含喺政府提出嘅修訂入面。明明政府已讓步，但公文袋仍反對。有人就批評佢哋受到網民影響，不分青紅皂白反對，因為一、兩點政治爭拗而癱瘓成個議會嘅功能。

公文袋《版權條例草案》草案委員會成員郭榮鏗就否認有關指控，佢話網絡世界日新月異，喺過去一年半草案委員會嘅審議過程中發現，泛民三個修正案，包括豁免個人用戶衍生內容（User-generated content, UGC）、引入「公平使用」概念，同埋「禁止合約加入凌駕條文」，都保障網民喺使用網絡時有更大自由，亦令資訊科技有更好發展，泛民同公文袋一直以嚟都係以呢個方向討論，並唔係因為網民講佢哋先至跟住講。

泛民議員被指轉軚都唔係第一次，商務及經濟發展局局長蘇錦樑上星期喺立會就踢爆，資訊科技界議員莫乃光突然「轉軚」，由支持草案變成反對，仲公開要求佢交代添！

第一手消息請下載on.cc東網iPhone/iPad/Android/Windows Phone Apps