政壇：公民力量食「老」本輸凸

公民力量喺二○一一年區議會選舉時，有資深區議員敗選，其時已響起要「年輕化」嘅警號，佢哋亦意識到要有年輕人參選。但知情人士形容「談何容易」，所以直至啱啱過去嘅選舉，仍未能搵到合適人選接班，只能仍然由老將「頂硬上」，最後導致大敗。

據悉佢哋曾開會檢討慘敗原因，認為服務落後於形勢、宣傳產品單一同傳統不無關係，且亦需改革，落實年輕化。目前已有部分議員助理表示有興趣參選，但人數唔太多，睇嚟要真正做到年輕化都唔容易。佢哋內部仍然計緊數，未決定呢班年輕人到底接任現有議席，定係收復失去咗嘅議席。

失5議席士氣低落

知情人士形容，公民力量一下子失去五個議席，係首次遇到嘅情況，所以內部氣氛低落，至今仍未恢復。主席潘國山為咗承擔責任，已表明希望明年改選時唔再擔任主席，但有成員希望待各個區議會選出正副主席後，再傾改選事宜，依家唔係適當時機。

另外，西九新動力總幹事陳文彥喺區議會選舉前約一星期辭職，據了解，尚有數日就會正式離職。主席梁美芬話陳文彥離職純粹係因為僱傭合約完結，並非與選舉有關，當有新總幹事上任時，會介紹畀傳媒認識。咁啱西九新動力喺選舉中亦失去多個議席，未知兩件事係咪純粹巧合？