城中鏡：馬清揚煮得
話說東華三院早前獲香港賽馬會撥款擴建旗下香港仔復康中心，一班董事局成員就趁開幕禮齊齊參觀擴建咗嘅展誠日間活動中心同宿舍，包括陶藝室、物理治療同職業治療室與小型戶外花園等，新設施將為智障人士提供更多發揮所長的空間。當日見總理Philip馬清揚喺天台復康花園對院友栽種嘅植物好感興趣，見佢用鼻聞吓植物就知係乜嘢香料，同點樣配合烹調食物，原來佢都「入得廚房」。
馬清揚指復康花園內好多植物適合做調味料，仲忍唔住聞吓添（圓圖）。
左起：楊嘉成、陳祖恒同馮敬安大讚院友有份製作嘅茶點。
何超蕸（右二）同李家祥（右一）參觀新擴建院舍時與院友交談。
院友整茶點好手勢
Philip對復康花園內種植嘅萬壽菊、薄荷葉、芥蘭頭等好感興趣，當佢靠近迷迭香時，就指用嚟烤羊架最適合，似乎對廚藝頗有研究。佢又話平日家人都鍾意食佢整嘅意粉同牛扒，好普通嘅菜式加少少香料就可以變到完全唔同晒，係精華所在，所以佢對香料特別留意。同場嘅副主席陳祖恒、總理楊嘉成同馮敬安就院友有份參與製作嘅小茶點同飲品好欣賞，大讚手勢唔錯。而副主席馬陳家歡、王賢誌同馬會大董李家祥等則聽院友解釋新設施使用方法，好似無線射頻辨識標籤（RFID），視障院友可以用安裝咗感應器的拐杖偵測沿路標籤，透過手機應用程式即時聽到語音導賞，知道眼前種咗乜嘢植物。
主席何超蕸指現時復康服務界行業仍面對人手短缺同招聘困難問題，目前學院每月約舉辦五項訓練活動，為百多人提供臨床實習同研究機會，希望可以培育更多有關人手。
