政壇：港交所周年晚宴 「超級英雄」渴市
聖誕節就快到，但竟然令到全中環嘅蝙蝠俠、超人、神奇女俠同美國隊長等造型同服飾突然斷晒貨，點解嘅，又唔係萬聖節喎？原來今年港交所同幾間外資行及基金公司，都不約而同以「Superhero」（超級英雄）做周年晚會主題，咪搞到啲造型衣着冚辦爛斷晒貨囉，真係有冇咁蹺呀？
周松崗（右）同李小加會扮邊個超級英雄？聽晚先知嘞！ （資料圖片）
好似近期受裁員消息影響嘅港交所，將喺聽晚舉行年度壓軸重頭戲嘅周年晚宴盛會。雖然周年晚宴年年都有特定主題，今年都算玩嘢，揀咗超級英雄做主題，個個要化身成英雄漫畫人物，行政總裁李小加一向係玩得之人，佢今年究竟會扮蝙蝠俠、超人定係變形俠醫？有人估小加可能會扮Iron Man嘞！主席周松崗又會扮邊位英雄？睇怕大家真係要到時至知。
港交所當日會搞個最佳服飾同造型比賽，鼓勵員工盡情扮嘢參與，但講真，Superhero嘅角色真係一啲都唔易Carry。相反，以往晚宴嘅主題就易搞得多，好似曾玩過懷舊Feel，個個着晒唐裝衫；又玩過美國牛仔Look！
