尋日立法會議員天主教監察組發表一四至一五年度嘅監察報告，檢視全體七十位議員過去一年嘅的工作表現，發現唔少資深議員都被點名批評，除咗新界鄉議局代表劉皇發繼續成為「懶蛇之冠」外，有十一位議員過去一年都無提出過任何動議及修正案，另外有兩名議員更被記「四個缺點」。不過，部分議員唔認偷懶，反而賴泛民主派「拉布」累事添！

怪醫方剛記4過

發叔喺一四至一五立法年度內六十八日會議中，一共缺席三十一次，不投票率更高達百分之七十。眾所周知，近年發叔老弱多病，很多時間均以健康為由缺席會議，但監察組發言人許煒斌並唔同情，指議員因身體狀況影響而未能履行議員職務，應該辭職。緊隨發叔後面嘅懶蛇分別是醫學界「怪醫」梁家騮同批發零售界方剛，批評兩人「缺席率高、不投票次數偏高、發言少同質詢少。」

報告亦點名批評十一名議員，指佢哋過去一年無提出任何動議同修正案，包括建仔陳恒鑌同譚耀宗、經民聯張華峰同發叔、白鴿黨涂謹申同「AV仁」何俊仁、工聯會黃國健、富貴黨田北俊、張宇人同鍾國斌、獨立林大輝，當中有九名都係多屆議員。黃國健話五月時曾提出有關退休保障嘅動議，但因為「拉布拉得太犀利」，喺拉布期間已討論過有關議題，故唔想再浪費時間先收回動議；至於修正案方面，佢話唔想「為提出而提出」。

至於佔三席嘅富貴黨，被監察組譴責。該黨主席鍾國斌直斥監察組「完全唔明白立法會機制同情況」！佢解釋，議員喺四年任期內最多只能提出兩次動議，而佢同黨友早已用咗兩次提出動議嘅機會，所以將機會留畀其他議員；佢亦批評「拉布」令議員可用嘅時間愈來愈少。睇嚟監察組嘅報告並非有太大說服力，反而畀機會建制派議員狠批泛民「拉布」添！

第一手消息請下載on.cc東網iPhone/iPad/Android/Windows Phone Apps