政壇：青政下戰書 嚇窒泛民

怕失「政治素人」優勢

梁頌恆承認青政有意喺多區派人參選，但由於選舉經費不菲，所以要分優次，首選會派出女神游蕙禎出戰九西。「上次區選已經證明，游蕙禎同梁美芬一齊選就會有好多票，同梁美芬一齊選係佢呢世宿命，不過都要畀時間佢考慮。」梁補充，青政喺九西有五個樁腳，之前選舉已同街坊打好關係，相信贏面好大。其次係新西，將會喺「青衣孖寶」黃俊傑、葉荏碩中二擇其一。

至於新界東選區，梁頌恆指要睇二月補選再作決定。佢透露，公文袋初步同青政就初選有兩次討論，如果青政成功勝出初選，成為泛民陣營唯一候選人，就會大收宣傳之效，屆時或會派人參選新東。梁頌恆不諱言曾考慮派候任青政黃埔西區議員鄺葆賢出選超級區議會議席，但因為未能取得十五個區議員提名而放棄，「唔想同其他人合作，唔係會無咗『政治素人』優勢。」

既然青政大部分選區都有考慮過，九龍東又點呢？佢話當區有東九龍社區關注組、慈雲山建設力量兩個傘後組織做地區工作，所以比較支持兩組織出選。東九龍社區關注組陳澤滔就話，佢哋正積極幫成功當選嘅成員黃子健處理地區工作，目前未係合適時間考慮參選。據了解，眾多傘後組織之中，只有青政有興趣再進一步踏入立會，究竟政治素人係咪吃香？明年中自有分曉。