潮汕有句歇後語「鴨仔跳東司—趕伙」，意思話鴨仔愛成群行動，只要一隻跳落池，其他都會跟大隊跳。其實鴨仔係咁，人稱「鴨仔團」嘅跨境學童亦係咁，個個似足甩繩百厭星，跟車保母真係要金睛火眼(目及)實，否則分分鐘出事o架。

呢，日前就有個大懵跟車保母懷疑睇漏眼，帶少一名男童落校巴過關，直至港方口岸入境人員清車檢查時，先至發現學童仍然喺車廂大覺瞓，雖然今次就話有驚無險啫，唔代表次次都咁好彩喎。

係人都知，近年係跨境學童入學高峰期，問題係相關配套嚴重滯後，尤其係行內校車及保母公司各有各做，質素參差，再加上收入有限，難以吸引新人入行，搞到業界人手不足。家陣一個保母閒閒地要睇實二十個精力旺盛嘅學童，莫講話一眼關七，有三頭六臂亦未必管得掂呀。

本報記者去落馬洲支線管制站口岸睇過，跨境學童話就話有保母看管，實情有等於無。大家有眼見，有啲保母唔單止無點算人數，仲一味吹水打牙骹，任得班細路將口岸當成遊樂場，書包當龍門，水樽當波踢，玩足半粒鐘都冇人理；仲有人爬上扶手電梯，當自己係奧運選手玩半天吊，可謂險象環生，危機處處。

話時話，小朋友百厭貪玩係天性，到處跳跳紮亦無可厚非，保母責任重大，點可以得過且過，掉以輕心o架。最離譜嘅係，關口明明設有學童專用通道，唔知點解保母帶學童行普通通道，同大量人潮逼過關，簡直要過五關斬六將。正如跨境學童關注組織話齋，水貨客衝關橫衝直撞，手拉車及貨物撞傷學童個案幾乎日日發生。仲有喎，萬一學童走失遇到拐子佬，咁就大件事嘞。

咪話危言聳聽，內地拐帶兒童十分常見，有啲被拐賣做童工，有啲被迷暈後取出器官販賣，甚至打殘淪為丐幫乞食工具，幾殘忍幾冷血都有。單係去年，全國共破獲超過一千四百宗拐賣兒童案件。犯罪無疆界，內地騙子可以喺香港大行其道，拐子佬入境犯案一啲唔出奇o架。

不怕一萬，就怕萬一。有人建議當局倣效監管校車嘅方法加強監管，有人提出加強保母培訓，唔係冇道理o架。可惜吖，當局一味當耳邊風，分明就係靠害。講到底，兒童係未來社會棟樑，亦係父母嘅心肝寶貝，有乜冬瓜豆腐，惟你班懶官僚是問。叮！