城中鏡：張偉High爆 搶先打鑼

話說尋日錦州銀行掛牌十五分鐘前，張董就已High爆似開show，不停手舞足蹈，叫台下各位一齊歡呼。咁都未夠，佢仲心急到，未開市就已經喺九點二十八分搶先打鑼！全場人即刻畀佢嚇驚驚，結果搞到要港交所職員急急腳走上台，嚟個溫馨提示「踏半先好打鑼」。噢，掃興添！

股價起伏 收報$5.1

錦州銀行尋日股價，可謂同張董嘅心情一樣咁跌宕，盤中價坐過山車一樣，最高上到5.3元，最低又試過跌穿招股價見4.22元。結果首日收報5.1元，比招股價4.66元高成9.4%，成績非常唔錯。

講到公司主事人喺首掛日情緒高漲，睇怕好難忘記今年七月上市嘅金嗓子董事長「江老娘」江佩珍嗰吓霸氣敲鑼，大概畀阿江老娘嘅豪氣熱情同磁性金嗓子鎮住，公司股價全日冇潛過水，收報較招股價高5.86%！

同樣令人印象深刻嘅，就係順客隆今年九月掛牌首日，佢哋主席勞松盛講起咁多年點湊大間公司，由佢十六歲講起，仲感觸到落下男兒淚！

嗰日順客隆股價同勞主席情緒一樣咁起伏，潛過水，但結果又上番水面，全日收報較招股價高5.2%。