城中鏡：童願成真
願望成真基金日前就為一年一度嘅聖誕慈善義賣活動「分享願望的喜樂」揭開序幕，唔少政商界名人都到場，支持基金為患重病兒童實現願望，食物及衞生局副局長Sophia陳肇始講起童年時嘅聖誕願望，自言當時好貪靚，有一年聖誕好想買一對當年熱爆嘅鬆糕鞋，點知阿媽極力反對；有政商界人士則趁節日當前，反思並珍惜目前擁有嘅一切。
陳肇始（左）同李國棟當年嘅童年聖誕願望均有實現。
劉仲恒（左）同太太馬露明（右）及其母親馬王培琪，支持基金為患病兒童實現願望。
蕭偉強（左）同彭耀佳現身活動揭幕禮。
陳肇始儲錢買鬆糕鞋
回想童年時嘅聖誕願望，似乎各人都有數之不盡嘅話題，其中Sophia話細個嘅聖誕願望好簡單，就係每年都想要新嘅衫褲鞋襪，而事實上，佢嘅父母基本上每年都會滿足佢呢個願望，但佢笑言，父母眼光同子女總係存在好大差別，通常父母覺得好睇嘅衫，同佢自己喜好嘅係有啲分別。佢憶述，最記得中學時代，當年好興鬆糕鞋，自己好想擁有一對，點知媽媽就一口拒絕，於是佢就儲儲埋埋啲零用錢，自己有一日喺學校附近嘅鞋舖買咗一對個底紅白相間嘅鬆糕鞋，最終連阿媽都冇佢符。
勞工及福利局副局長蕭偉強亦同聖誕有淵源，事關佢係平安夜出世，而細個好鍾意睇漫畫，由於當時家境一般，所以買漫畫係好奢侈嘅事，佢只能趁喺街邊檔剪頭髮時先有機會睇，因此，佢每年嘅聖誕願望都係希望擁有一個漫畫圖書館，仲記得媽媽有次送咗《三國演義》同《財叔》兩套漫畫畀佢，令佢相當驚喜，至今仍然珍而重之。
同場仲有香港醫學專科學院主席李國棟同總商會主席彭耀佳，齊齊現身支持願望成真基金主席Kevin劉仲恒，Kevin講起聖誕願望不單純停留喺物質層面，佢認為好多人嘅童年願望都係單純，但長大後嘅願望就變得抽象同難以實現，因此每年當呢個活動到來，除咗幫患病兒童實現願望外，亦會思考三個目前擁有並讓自己覺得幸福嘅東西，為自己注入更多力量。
