你估吓，賺最多嘅華爾街才俊讀乜嘢出身？金融？唔係喎。平均嚟計，賺得最多錢嘅係主修「電腦科學」，計番港紙平均月薪有三十幾萬港元；其次係「物理、生命科學及護理」，第三先係「經濟」，「會計、商業及金融」排到第四咋，估唔到哩。
仲有嘢你估唔到，華爾街乜嘢人都有，文科仔都唔少，主修「人文科學」（即是歷史、地理、政治）嘅排第八位，平均月薪有十五萬o架；而主修「英國文學」一樣喺華爾街有市場，月薪平均計有十四萬幾。
呢啲資料，嚟自專門比較各行各業薪酬嘅網站Emolument，佢哋搜集咗八百四十位紐約金融才俊，由分析師、Associate、副總裁（Vice President）問到董事，大大細細嘅投行包括花旗集團、JPMorgan、巴克萊、美銀美林，仲有對沖基金呢類Buy-side人。
佢哋仲發現，人工最高嘅嗰幾位分析師、Associate、VP同董事，頭三位依次都竟然一樣係主修「管理及策略」、「會計、商業及金融」、同「數學及統計」！真係有咁啱定點呢可。
第一手消息請下載on.cc東網
