政壇：四鴿鬼祟見肥佬黎 疑斟接班謀再攪局
壹傳媒集團前主席「肥佬黎」黎智英最近頻頻「攪局」，其中外號「李漢奸」嘅白鴿黨創黨主席李柱銘，短短四日內三次現身黎宅，另外白鴿黨兩名前主席「AV仁」何俊仁同「高達」李永達尋日亦齊齊現身，值得留意嘅係，政圈盛傳會接棒做白鴿黨主席、現任黨總幹事林卓廷罕有地參與密會，莫非係三個白鴿黨前主席帶佢嚟，提早向肥佬黎「面試」？
林卓廷（後左）罕有地聯同李柱銘（右）等人參與密會。
黎智英再「攪局」，何俊仁（右）同李永達（後左）亦有現身。
尋日下午六時四十五分，肥佬黎先派司機駕駛七人車，分別接高達、AV仁同林卓廷前往其寓所，而約半個鐘後，李漢奸亦抵達黎宅，但佢就特別鬼祟，喺車上已經落窗簾遮住自己，落車時，更刻意用車身遮擋，其實佢係參加密會嘅常客，做乜今次要咁煞有介事呢？
直至晚上八時許，眾人再由肥佬黎司機駕駛七人車送各人離開，首站係於太子港鐵站附近放低高達，再過海去立法會停車場放低林卓廷，之後分別再送李漢奸同AV仁返回其位於山頂及天后嘅住所。林卓廷事後接受查詢時稱，今次純粹係私人聚會，會面中無提及參選立法會或接任黨主席等事宜。真係信不信由你嘞！
