被網民稱為「網絡23條」嘅《2014年版權（修訂）條例草案》聽日喺立法會恢復二讀，面對網民喺社交網站「洗版」呼籲反對草案同反對陣營嘅浪接浪攻勢，商務及經濟發展局局長Greg蘇錦樑無視《版權條例》迅速發酵政治化，過去多日只係蜻蜓點水，宏觀地回應外界對《版權條例》嘅批評，相反要直接回應網民嘅諸多質疑，埋身肉搏打輿論戰嘅責任，通通推晒畀一批公務員拆解，近日更有傳有關方面制訂推銷「網絡23條」嘅策略，就係唔想令事件政治化，所以唔好畀政治問責官員講解，如果呢個邏輯係成立嘅話，咁阿Greg等高官仲會有立足之地？
首先出嚟擋箭嘅係知識產權署署長梁家麗，一口氣接受多個電視台同電台訪問，嘗試拆解網民質疑，其後接力出場嘅係商經局副秘書長黃福來，尋日早上同「版權及二次創作關注聯盟」代表同場愈辯愈明，及至下午，阿Greg現身參觀競爭事務委員會辦公室，但咪以為佢會搶住「拆彈」，會見傳媒時，只係答咗數個關於《版權條例》問題就走人。
靠常秘推「官方懶人包」
商經局其後未知係咪「知衰」，即時「補鑊」舉行傳媒簡報會，惟擔大旗係常任秘書長容偉雄，遲咗幾拍先推出「官方懶人包」，去抗衡網民反對草案嘅「懶人包」。
阿Greg無親身去解釋「官方懶人包」究竟係咪另有重任？尋晚終於有答案，原來佢先後出席工商政黨三周年活動、新一屆新界鄉議局就職典禮活動，究竟事情孰輕孰重，答案不言而喻。
其實佢喺重要關頭「甩轆」都唔係首次，早年有免費電視發牌爭議，最近喺成立旅遊業監管局工作被批歎慢板，加上今次《版權條例》喺闖關前夕連番捱打，有建制派中人私下話，如果再見到有問責官員無承擔，睇怕遲早有人推出「官員懶人包」，間接教吓身為高官應該有嘅素養同承擔嘞！
第一手消息請下載on.cc東網
