政壇：大輝鬥「曾」 暗寸吳得掂
近排立法會教育委員會主席、廠商會代表「大輝」林大輝同教育局局長「吳得掂」吳克儉嘅恩怨，簡單嚟講係「冰凍三尺、非一日之寒」，多次爆發隔空罵戰，唔好以為教育問題先會撻着大輝嘅神經，佢尋日出席立法會財經事務委員會會議，開宗明義問及與會嘅財爺「鬍鬚曾」曾俊華，係咪要學吳得掂睇多啲書，如每個月睇五十本書，以此學習新板斧，擺明寸爆聲稱每月可閱讀三十本書嘅吳得掂。
財經事務委員會尋日舉行會議，當時係討論緊香港整體經濟最新狀況，大輝突然出招問及鬍鬚曾係咪要睇多幾本財經書，明眼人都睇得出係寸緊吳得掂早前嘅睇書言論。
針鋒相對 屢爆罵戰
就此，鬍鬚曾回應時無加多腳落去，只係輕描淡寫話大輝如果有書籍介紹，佢表示歡迎而且會搵時間睇睇，一下子就將個波拋番畀大輝喇！
事實上，大輝同吳得掂兩人屢次針鋒相對，近期最為人熟悉嘅一幕，同全港性系統評估（TSA）有關，委員會舉行公聽會聽取各方對小三TSA嘅意見，吳得掂以個人理由婉拒出席，總之就係夾來夾去，都好似冥冥中注定唔會夾得啱出席會議嘅日子。終於喺公聽會當日，與會者猛烈批評吳得掂唔嚟聽意見，而頂替吳得掂出席嘅副局長楊潤雄就做咗箭靶。
大輝之後又喺教育事務委員會會議出招，當時係商討大學校監同校董會嘅產生方法，佢以冇要求吳得掂出席為由，最後該議題延至下次再討論，變相再將個波踢去吳得掂度。此外，大輝之後又狙擊吳得掂出席教育事務委員會會議，一個講會議出席率，一個講議題出席率，總之雙方就各說各話，爭拗停不了。
