高鐵爛尾必成災 點止損失幾十億

話說高鐵工程延誤超支搞到滿城風雨，港府即將向立法會申請近二百億元嘅追加撥款。運輸及房屋局局長張炳良話喎，家陣唔應該着眼於工程延誤原因或超支係咪合理，而係睇工程爛尾對社會造成嘅後果。佢仲強調當局無「Plan B」，如果叫停高鐵工程，將帶來直接損失四十八億元，若永久性停工，更加唔止呢條數添。

係人都知，高鐵工程完成得七七八八，如果真係爛尾，何止損失幾十億元咁少，之前投入嘅幾百億元隨時化為烏有，當局更加可能要向承建商賠償數十億元。仲有呀，現時嘅西九龍總站變成一個大窿，工程爛尾點樣填補呢？呢筆爛帳由邊個埋單呢?

明眼人都睇得出，當局出口術話無「Plan B」，根本就係靠嚇，希望立法會唔好阻頭阻勢，快啲通過追加撥款。問題係，家陣立法會拉布成風，反對派議員會唔會收手呢？萬一追加撥款唔可以如期通過，當局又點樣應變呢？

再講喇，高鐵問題多多，除咗超支之外，一地兩檢更加棘手吖。張炳良聲稱只要香港同內地有意志落實，有足夠信任，可以喺《基本法》下就一地兩檢作出相應安排。佢仲舉例話，英國及法國係兩個國家，英法鐵路都可以解決通關問題，睇唔到香港及內地唔能夠解決喎。

高官講得輕描淡寫，可惜事實冇咁簡單。事關高鐵總站喺香港境內，要實行一地兩檢，難免要容許內地人員喺香港執法，喺高度政治化嘅今時今日，反對派政客必定上綱上線，又話違《基本法》，又話破壞一國兩制，唔搞到七國咁亂至奇吖。

最好笑嘅係，有政黨提議「車上檢」，亦有人建議由港方代內地人員執法喎。其實，如果話內地派人來港執法係違反《基本法》，咁由香港代內地執法豈不是更加違反一國兩制？香港究竟有乜權利呢？唔通兩制大過一國？

講到底，一地兩檢問題已經被政治化，想說服立法會通過追加撥款都幾難，萬一處理得唔好，隨時成為政治炸彈，都唔知點收科，叮！