娃娃親係古老嘢，不過，同為工業界二代嘅香港工業總會青委主席Gary劉燊濤同時捷集團執董Jacky嚴子杰，就玩搞笑版現代娃娃親。
佢哋兩個感情好好，唔止喺同一間拳館學打泰拳，早前仲齊齊升呢做爸爸。早幾日兩人出席活動時，傾談之間，仲幫子女訂下親事，頻頻以老爺同外父互稱，擺明搞笑。兩位爸爸私底下雖對咗親家，但其實未夠一歲嘅「當事人」仲未見過面。Gary笑笑口話，遲啲Jacky嘅囡囡搞一歲生日派對，佢會帶囝囝去識吓「女朋友」喎！
