政壇：樹根圖收失地續租漁灣議辦

盤據東區漁灣約二十年嘅民建聯立法會議員鍾樹根，喺今次區議會換屆選舉中老貓燒鬚，輸咗畀提名期最後一日先報名參選嘅「傘兵」徐子見。樹根早前表明喺邊度跌低，就會喺邊度企番起身，據知佢將會以立法會議員名義續租漁灣邨嘅辦事處，睇嚟已經準備好收復失地。

除咗續租辦事處，聽講樹根喺今個月底會搞一場大型蛇齋餅糉活動，相信係為咗反擊早前慶祝佢落選嘅派對。不過，根據房委會指引，最優先租用公共屋邨單位作議員辦事處嘅應該係區議員，其次先係地區直選嘅立法會議員同功能界別議員。樹根今次咁做，唔知算唔算生人霸死地呢？

此外，啱啱結束嘅區議會選舉開支陸續披露，原來有人不花分毫、零開支都當選，譬如喺無對手下自動當選嘅元朗十八鄉西選區程振明、屏山中選區鄧慶業、錦田選區鄧卓然同大埔太和選區鄭俊和，佢哋申報嘅選舉開支均為零。