政壇：饒老作品展 名人紛捧場
國學大師饒宗頤以學術研究聞名於世，亦擅長書畫藝術，早前「香江藝韻──饒宗頤教授百歲學藝展」開幕，好多饒老粉絲到場支持，包括饒宗頤學術館之友會長陳邱敏英同香港潮屬社團總會首席會長高佩璇，佢哋今次有份將珍藏嘅饒老作品拎出嚟展覽，公諸同好。
陳邱敏英（右）同高佩璇都有收藏饒宗頤嘅作品。
同場仲有叙福樓集團創辦人黃耀鏗夫婦，佢哋同饒老相識多年，仲話饒老對人非常上心，又好錫佢哋個仔黃傑龍，時不時送畫畀佢喎！
今次展覽共展出一百零八幅作品，包括饒老獨自或與友人共同創作嘅各式繪畫、書法，另有逾二百本著作。香港大學饒宗頤學術館副館長（藝術）鄧偉雄估計，約有五分一展品係首次展出。
