自由黨最近積極拉攏公民力量沙田區議員龐愛蘭入黨，有人估係為明年初舉行嘅新界東補選試票。不過，龐愛蘭尋日明言拒埋自由黨堆，又表明唔參加新界東補選，一刀剪斷同自由黨嘅一線良緣。換言之，該黨要另覓人選參加補選，最壞情況或是黨內老將再次披甲上陣。

傳劉健儀出山戰新東

政界一直有傳自由黨田北俊會喺於明年立法會選舉由新界東轉戰香港島，奈何未搵到合適人選接棒新界東議席，雖然田北俊過往曾多次公開表示，有意羅致工業界議員林大輝，但即使開出做黨魁作條件，都未獲對方首肯。有傳該黨前議員劉健儀或出山參選新界東，最近又有傳龐愛蘭入黨。不過，龐愛蘭透露，尋日同多名自由黨高層見過面，已當面婉拒入黨。

龐指，早前有關佢考慮入黨嘅報道引來選民反響，選民傾向佢繼續以獨立人士身份服務社區。此外，佢未來數月要集中精神跟進屋苑維修工程，加上農曆新年期間需前往加拿大探訪身體欠佳嘅奶奶，估計未能同時準備新界東補選工作。

第一手消息請下載on.cc東網iPhone/iPad/Android/Windows Phone Apps