政壇：工記直選隨時清袋
明年立法會選舉嘅變數，或可從啱啱結束嘅區選中睇到。區選失兩席嘅工聯會（工記），據聞出年選情都趨黯淡，最壞情況係回復當年立會得三席嘅局面，當中較危嘅係兩名勞工界議員郭偉強、鄧家彪同年資較深嘅直選議員黃國健，佢哋會否三兄弟齊落難？真係要睇出年嘅打拚喇。
兩勞界議席限坐一屆
工記兩個勞工界功能組別議席向來有內部規定，該議席只可做一屆，四年之後就要讓位畀新人，所以原先嘅議員一係就轉地區直選，一係就摺埋收山，故郭偉強同鄧家彪都有意轉直選。原本郭偉強打算出選港島區，但隨着該區議席「七變六」，選情可謂雪上加霜，佢最近頻頻現身九龍西，似乎係瞄準該區新增嘅一席，但今次區議會工記痛失老巢馬坑涌選區議席，佢可唔可以為工記取得九龍西一席真係有難度。至於打算轉戰新界東嘅鄧家彪，喺建制派爭崩頭嘅情況下加入混戰，本來贏面就唔大，相信新界東補選會為佢嘅選情再添變數。
黃國健喺九龍東嘅選情都相當嚴峻，有知情人士分析，工記喺九龍東嘅票源主要嚟自年長一群，選民人數或向下跌，而且工記嘅地區樁腳唔多，今次區選仲失去黃大仙池彩區樁腳，加上盛傳民建聯九龍東議員陳鑑林將交棒畀黨友觀塘區議員柯創盛，會唔會再好似以往咁配足票畀工記呢？
危機多多，工記似乎剩低新界西立法會議員麥美娟表面四平八穩，但據聞佢同地區樁腳關係麻麻，下屆仲坐唔坐得穩真係睇造化。數數下，較穩妥嘅只剩番可能循「超級區議會」出選嘅立法會議員王國興。工記會唔會由現時最鼎盛嘅六席跌番落三席嘅低谷，一眾工記高層真係要搲爆頭。
