「香港是我家，怎捨得失去它，實在極不願，移民外國，做二等公民。」呢首形容八十年代移民潮嘅流行曲，回歸前唱到街知巷聞，今時今日一樣咁應景，問你服未！

講多無謂，數字最實際。有移民顧問公司負責人表示，近年查詢及申請移民嘅人數一直有上升趨勢，今年升幅更較去年同期增加二至四成，每月平均有成二十宗個案咁多；而根據保安局數字，淨係舊年已經有近七千名港人移民外國，都咪話唔得人驚。

點解港人紛紛遠走他方？衣食住行樣樣難，咪惟有用腳投票囉。正如有做食品生意、準備舉家移民加拿大嘅中產人士話齋，本港教育制度失敗，小朋友讀書壓力太大，移民都係為咗保護佢哋咁話。

咁又係吖，本港教育制度五時花六時變，愈改愈衰，淨係一個全港性系統評估（TSA）已經搞到天怒人怨。尋日立法會聽證會上，有小朋友大吐苦水，話操練壓力太大，「唔知生存有咩意義」，真係聞者傷心。其實，高官早就將仔女送晒去外國留學，親身示範點樣用腳投票，市民只係上行下效，有樣學樣啫。

話時話，香港生存環境惡劣，點止教育制度「兒童不宜」咁簡單。樓價長期高企難下、食安問題長爆長有、醫療失誤無日無之，連飲啖水都驚中鉛毒，最慘係社會愈來愈政治化，搞到家嘈屋閉，雞犬不寧。以前香港係「經濟城市」，人人專心揾銀，最適合做生意，家陣內耗多過食飯，社會不穩，營商環境又點會好？唔怪得愈來愈多商家棄守香港大本營，北上大展拳腳喇。

有條件嘅中產人士固然走夾唔抖，基層市民只要有好路數，一樣頭也不回執包袱走人。好似有位內地來港多年嘅女士咁，佢因為丈夫過身，而所住公屋又屬丈夫名下被收回，遂決定返內地居住，話貪內地有社保又有屋住，好過喺香港攞綜援喎。內地亦有意為單程證人士設立返回機制，容許佢哋放棄香港身份證，返內地定居，證明呢個唔係個別現象。風水輪流轉，以前內地人覺得香港遍地黃金，趨之若鶩，家陣好多來港讀書嘅「港漂」，住夠七年都寧願放棄永久居民身份，返家鄉發展，呢啲咪良禽擇木而棲囉。

「百年養不足，一日毀有餘」，香港由小漁村變成國際都會，遲早又變番小漁村，唔通真係天數早注定？叮！