城中鏡：宣萱撐領養中年犬 安樂窩奉旨食玩瞓

藝人Jessica宣萱同Toby梁靖琪尋日出席慈善午宴，專誠到場宣揚有關領養同愛護動物嘅訊息。Jessica透露現時家中養咗三隻愛犬、兩隻貓同一缸魚，坦言養寵物前，必須注重承諾嘅重要性，又透露早前提及患上癌症嘅愛犬已在數月前離世，但仍會繼續領養其他中年狗隻，佢話：「好多人鍾意由bb狗養起，但佢哋得十四、十五歲命，我希望喺佢哋生命行到一半時，都有人去錫去愛，有好嘅環境生活。」佢又話唔會訓練狗隻懂得任何指令：「我只希望佢哋開心、食得飽、瞓得好，有個安樂窩，如果另一半討厭狗，我係唔會同佢開始。」而養有兩貓一狗嘅Toby，就話喺Jessica身上學到好多有關寵物嘅知識，又透露現為無綫拍攝入行十年以來嘅第一部古裝劇，笑言暫未有時間拍拖，現階段只追求開心同希望日後可搵到一位很合拍嘅人。