城中鏡：湛琪清搵男友 先問「掃描器」
甄子丹太太汪詩詩嘅表妹Jessica湛琪清前晚身穿大露背長裙出席籌款晚會，佢話雖然天氣較冷，但亦想嘗試唔同嘅造型。跟媽媽Christina一同前來嘅佢，話好開心媽媽同爸爸專誠來港為慶祝佢十二月一日嘅二十六歲生日：「媽咪由洛杉磯飛過嚟同我慶祝生日，依家已經準備同屋企人，媽咪、詩詩、圓圓、Karson（蔡加讚）、婆婆等，一齊食生日飯慶祝。」問到係咪想搵到男朋友作為生日禮物？佢形容搵男朋友要過五關斬六將，話：「因為詩詩個囡囡（Jasmine）同仔仔（James）都會有意見，佢哋會話鍾意呢個，唔鍾意呢個，以前有帶過追求者畀佢哋見，Jasmine睇得好清楚，話邊個係對我好好，我諗佢係我嘅boyfriend scanner（男友掃描器），同埋我嗲哋媽咪都有啲要求。」
Anthony（左）、 Jocelyn（中）同湛琪清盛裝出席籌款晚會。
Jocelyn難捨No.2媽咪
同場仲見到名模Jocelyn同老公Anthony。攜外婆一同前來嘅Jocelyn話婆婆從夏威夷來港陪自己兩個月，婆婆已八十五歲，係第一次嚟香港。問到婆婆有冇催佢哋生BB？Jocelyn坦言：「當然有，但我哋同佢講要先努力做嘢，佢係我第二個媽咪，每日都寵愛我，由我細個開始照顧我，佢嚟咗一個月，剩番一個月時間喺香港，好唔捨得，不過婆婆應承到我有BB，就會幫我湊，仲會搬嚟同我哋一齊住。」身旁嘅Anthony亦話好喜歡婆婆來港相伴：「因為祖父母喺我細個時已經離開咗，所以見到Jocelyn有外祖父母照顧同陪伴，就好似自己都有新嘅祖父母咁。」
