話說候任大坑區議員楊雪盈日前公開同政制及內地事務局副局長陳岳鵬嘅訊息，內容係陳岳鵬想約佢出嚟「飲杯嘢，傾計（偈）交流一下」，點知遭對方請食檸檬，仲令單身嘅陳岳鵬被質疑「溝女」。同陳岳鵬老友鬼鬼嘅民政事務局政治助理徐英偉，尋日喺fb上載兩人同將軍澳區議員方國珊嘅合照，話「約咗一位熟悉社區的議員遲啲落去區飲杯野（嘢）」，好明顯係為陳岳鵬約女仔食檸檬一事補鑊喇！

徐英偉（左）喺網上發功，藉約晤方國珊（中）幫陳岳鵬補鑊。（互聯網圖片）

其實除咗晒合照，徐英偉尋日較早時已喺fb發貼，指政府嘅工作愈嚟愈難做，要做好官民溝通亦唔容易，仲話「以後啲工作安排都係先同老婆報定案」，以免搞到家變喎！徐英偉句句有骨，似乎係暗示陳岳鵬約楊雪盈係公事，但就畀人「小事化大」。徐英偉兩次試圖幫陳岳鵬化解誤會，呢個兄弟都算唔話得。

第一手消息請下載on.cc東網iPhone/iPad/Android/Windows Phone Apps