政壇：徐立之港科院 搵陳成城助陣
由香港大學前校長徐立之牽頭成立，並出任創院院長嘅香港科學院，計劃每年向對香港有貢獻嘅頂尖科研人員頒授院士，打造如中國科學院、美國國家科學院等權威性智囊。根據公務員事務局嘅登記冊，原來創新科技署前助理署長陳成城喺兩個半月前受僱於港科院，擔任秘書長一職，負責推廣本港科技發展，相信係睇中佢過往嘅工作經驗。
徐立之
徐立之尋日出席電台節目時話，學界早喺○六年，已成立小組研究成立港科院，直至最近獲政府及商界捐款支持先成立。佢話創院時將會有二十七名創院院士，包括兩名諾貝爾獎得主。而陳成城就喺舊年一月初離開政府，並喺今年九月出任港科院秘書長。
其後被問到港大嘅管治氣氛係咪較其在任時更嚴峻，徐立之話喺港大任職十二年，非常關注港大嘅事，但離職時，已表明唔會對港大指指點點，又認為公開評論比指指點點更過分，所以拒絕回應喎。
