政壇：搞搞政：爭區會正副席 建制鬼打鬼

樹根落敗 東區勢危

綜合各方消息指出，工聯會四年前已計劃喺東區正副主席分一杯羹，而基於工聯會當時只有五席，又未獲其他建制議員祝福，因此由建仔黃建彬同龔栢祥取得正副主席位置。

時至今日，一直喺東區大權在握嘅建仔鍾樹根意外落敗，加上建仔東區支部疑於今屆區選多處樹敵，包括派出鍾樹根助理植潔鈴以獨立身份挑戰富貴黨前成員林翠連，建仔洪志傑則挑戰資深議員杜本文等，據知雖然最終挑戰失敗，惟已引起部分獨立建制派不滿，有意同今屆取得六席嘅工聯會尋求合作。

按照目前東區區會形勢，建制派合共有二十五席，其中建仔有十席、工聯會有六席、富貴黨兩席，其餘則為獨立建制議員，因此富貴黨同獨立建制取向甚為關鍵，加上今屆泛民議席數目增至十席，只要眾人連成一線，向建仔代表說不，有機會爆冷至少取得區會副主席，甚至向東區主席進發。

工聯會東區區議員郭偉強接受查詢時，無否認工聯會係咪想染指區會主席或副主席，僅稱唔會係自己或王國興，另外四名工聯會資深議員都有機會，強調會喺下月中同其他建制派溝通，再作最後決定。