新一屆區議會選舉塵埃落定,各黨派隨即展開賽後檢討,以便重新部署選舉策略。其中建制派大黨建仔雖然保得住百多個議席,但面對兩名雙料議員鍾樹根、葛珮帆同多名資深議員意外落敗,就引嚟黨友議論紛紛。建仔主席李慧琼對外解釋時講得冠冕堂皇,話今次區選完成咗新舊交替,老將落敗就總結為輕敵同疏忽等。不過,聽聞建仔喺選舉翌日召開中委檢討賽果,黨友之間就互相指摘同推卸責任,人前人後兩個樣,唔通真係輸咗賴地硬?

綜觀建仔嘅分析,可以將落選原因歸納為輕視首投族同傘兵;資深議員以為贏硬,自己嗰區唔多理,反而走去幫黨友助選;部分人地區工作做得唔好,以致議席輕易被人奪去等。

年長 輕敵 無證 藉口多多

建仔對外就解釋得好大方,亦無怪責落選嘅黨友,但一眾黨友閂埋門做檢討時,就出現唔同版本。唔知係咪見到今屆出現好多年輕面孔,有人喺會上抱怨部分議員年紀太大所以輸,有人就反駁唔關年紀事,更指自己獲得嘅選票比上屆多;亦有人怪責部分資歷較深嘅議員覺得唔需要助選,甚至連洗樓名單都無,結果危急關頭先搵番僅有嘅名單洗樓救亡。不過,最離譜嘅係,竟然有人歸咎自己輸係因為選民嘅身份證畀仔女收埋。如果事件屬實,就事關重大,點解當時唔報警呢?

之前已有建仔議員講過,佢哋唔擅長網絡攻勢,喺呢方面較為輸蝕。其實上述說法都有迹可尋,因為有人事後先發現,現時社交網站嘅群組有唔同功能,尤其一啲關於交通資訊嘅群組,喺放工時間特別多人睇。因此,如果有黑材料放咗上去,好多就會傳開,當事人連澄清都做唔切咁話。為免重蹈覆轍,睇嚟大家都要正視上述嘅問題喇!

第一手消息請下載on.cc東網iPhone/iPad/Android/Windows Phone Apps