香港教育學院副校長(研究與發展)遴選「見光死」!該職位唯一候選人、現任美國喬治亞州立大學孔子學院總監劉駿(Jun Liu)嘅身份日前曝光後,劉駿隨即被外界質疑同內地關係密切,引起教院師生非議,遴選委員會尋日下午突向教院師生公布,劉駿因私人理由退出遴選,校方將重新啟動全球遴選工作。

劉駿因私人理由退出副校長遴選,教院將重新啟動全球遴選工作。(互聯網圖片)

教院原定下周二同周三舉行副校長(研究與發展)遴選諮詢會,畀劉駿直接面對師生提問,豈料劉突然退出遴選。遴選委員會尋日向教院師生發出嘅電郵,並冇交代佢退選嘅具體原因,只係話因personal reasons(私人理由),因此兩場諮詢會將取消。遴選諮詢會話尊重劉駿嘅決定,但同時對此感遺憾。

教院學生會會長兼副校長遴選委員會成員梁浩正話,會密切留意副校長遴選的進展,佢話遴選委員會較着重討論候選人嘅教學同研究履歷,未有詳細考慮候選人就學術自由、院校自主等核心價值嘅取態,佢會喺遴選委員會開會時提出要審視候選人喺呢方面嘅立場,同時會更深入了解候選人嘅背景。

第一手消息請下載on.cc東網iPhone/iPad/Android/Windows Phone Apps