城中鏡：羅傑斯為女遷星洲

商品大王羅傑斯縱橫投資市場，股市、黃金、大宗商品都難佢唔倒，咁佢又點睇自己做嘅投資呢？佢尋日喺香港出席論壇時話，自己一生中最成功嘅投資就係生咗兩個囡囡Happy同Bee。

羅傑斯同兩個精靈寶貝女Happy（左）、Bee兩年前嘅合照。（資料圖片）

尋日佢仲即場播放同兩個囡囡嘅生活片段，大女Happy（十二歲）朗讀邵雍嘅《蒙學詩》，細女Bee（七歲）就唸急口令同李白嘅《靜夜思》，幾咁Sweet，呢兩個囡囡啲普通話仲非常標準，分分鐘好過大家添！咁梗係，羅傑斯就係為咗兩個囡囡可以學好中文，幾年前先成家由紐約搬去新加坡。

羅傑斯出咗名情有獨「中」，睇好中國市場，咁第時囡囡大個帶個中國男仔返屋企，老竇點睇？羅傑斯話呢啲留番畀囡囡自己決定喎。